ქართული ღვინო - ღვინის ეროვნული სააგენტო

ზოგადი

ღვინის ეროვნული სააგენტოს თავმჯდომარე ლევან მეხუზლამ  მწარმოებლებთან შეხვედრაზე  ღვინის ხარისხის სრულყოფის მიზნით მიმდინარე რეფორმაზე ისაუბრა.
საქართველოს მთავრობის განკარგულებით, ჭარბი მოსავლის შემთხვევაში, თუ კერძო სექტორი არ გამოხატავს ყურძნის შესყიდვის ინტერესს, სახელმწიფოს მხრიდან 1 კგ ყურძნის შესასყიდად განისაზღვრა შემდეგი ფასები: ,,ვაზისა და ღვინის შესახებ“ საქართველოს კანონით ნებადართული ვაზის ჯიშებისგან მოწეული ყურძენი: შაქრიანობა აღემატება 20%-ს - 1,30 ლარი; შაქრიანობა 17%-დან-20%-მდე - 80 თეთრი, შაქრიანობა არ აღემატება 17-%-ს - 30 თეთრი; რაც შეეხება საფერავს: შაქრიანობა აღემატება 22%-ს - 1,50 ლარი, შაქრიანობა 17%-დან - 22%-მდე - 90 თეთრი, შაქრიანობა არ აღემატება 17-%-ს - 30 თეთრი.
ამასთან ერთად, ,,ვაზისა და ღვინის შესახებ“ საქართველოს კანონში შესული ცვლილებებით,  მიმდინარე წლის 1 მაისიდან სამეწარმეო ვენახის გაშენებაზე თანხმობას სსიპ ღვინის ეროვნული სააგენტო გასცემს. სამეწარმეო ვენახების გაშენებაზე თანხმობის მიღება დასჭირდებათ იმ პირებს, რომლებიც მიმდინარე წლის 1 მაისის შემდგომ პერიოდში გადაწყვეტენ კომერციული მიზნებისთვის ვენახის გაშენებას.
„ყველა ვთანხმდებით, რომ ღვინის ხარისხი იწყება ვენახიდან და ყურძნიდან.  მომავალი განვითარებისთვის სხვა ალტერნატივა არ გაგვაჩნია - მხოლოდ და მხოლოდ ხარისხი. რთველის დროს ყურძნის ხარისხის მიხედვით ფასთა სხვაობა გასულ წელს უკვე დავნერგეთ. გამოცდილებამ გვიჩვენა, რომ მეტი აქცენტია გასაკეთებელი ხარისხთან მიმართებაში. ყველამ უნდა გავაცნობიეროთ საკუთარი პასუხიმგებლობა დარგის მომავლის წინაშე, ხარისხიანი ღვინის წარმოებისთვის ვიზრუნოთ ვენახსა და  მაღალი ხარისხის ყურძნის მოყვანაზე“, - აღნიშნა ლევან მეხუზლამ.
შეხვედრაზე საუბარი შეეხო გასულ წლებში დანერგილ სიახლეებს, რომლებიც დადებითად აისახა ყურძნის ჩაბარების პროცესზე, კერძოდ, ელექტრონული სასწორებს, რომელმაც ყურძნის აწონვის პროცესი გაამარტივა და უფრო სანდო გახადა.  

ლევან მეხუზლამ შეხვედრის მონაწილეებს ასევე გააცნო "ვაზისა და ღვინის შესახებ" საქართველოს კანონში დაგეგმილი ცვლილებები. კერძოდ, იცვლება „მცირე ზომის მარნის“ დეფინიცია და მისი წლიური წარმადობის მაქსიმალური ზღვარი 40 000 ლიტრიდან 25 000 ლიტრამდე მცირდება. ამასთან, ტერმინი „სახლის ღვინო“ იცვლება ტერმინით - „ბუნებრივი ღვინო“, სავალდებულო ხდება სერტიფიცირებული ალკოჰოლიანი სასმელების ნიშანდება, რასაც ღვინის ეროვნული სააგენტო განახორციელებს, საქართველოს გარემოს დაცვისა და სოფლის მეურნეობის მინისტრის მიერ დადგენილი წესით. აღინიშნა, რომ ნიშანდების მომსახურების საფასურად განისაზღვრა მაქსიმალური ზედა ზღვარი - 1 ბოთლზე 10 თეთრი. გარდა ამისა, როგორც საექსპორტოდ, ისე ადგილობრივ სამომხმარებლო ბაზარზე რეალიზაციისთვის განკუთვნილი ყველა კატეგორიის ღვინო დაექვემდებარება სავალდებულო ორგანოლეპტიკურ შემოწმებას, გარდა „ბუნებრივი ღვინის“ კატეგორიისა.

ღვინის ეროვნულ სააგენტოში მწარმოებლებთან გამართული შეხვედრა კითხვა-პასუხის რეჟიმში წარიმართა.