Georgian Wine - National Wine Agency

ჩვენი საოჯახო მარანი ტრადიციისა და მიკროტერუარის უნიკალური სიმბიოზია.  

საოჯახო ტრადიცია დღემდე გრძელდება და დღევანდელ მემკვიდრეობას წარმოადგენს ტერუარული მეღვინეობა-"ჯანაანის ღვინის მარანი"-ჯანაანის მეღვინეობა და მევენახეობა",რომელიც მდებარეობს საქართველოს ყველაზე მნიშვნელოვან ღვინის რეგიონში - კახეთში, თელავის მუნიციპალიტეტის სოფელ რუისპირში.

ოჯახი ფლობს ვენახებს სოფელ რუისპირში - ადგილი, რომელიც განსაკუთრებული გარემო კომპოზიციით გამოირჩევა - "ჯანანი" ეწოდება. "ჯანაანი" - მიკროტერუარია. სწორედ აქედან მოდის ჩვენი საოჯახო მარნის სახელიც.

ჩვენ  ვართ პიონერები და  პირველებმა ჩამოვასხით ღვინო ამ ადგილზე მოყვანილი ყურძნისგან. ამიტომ ღვინოს  JAnaani Ambassador  დავარქვით - ელჩი მიკრო-ტერუარიდან,  სადაც გამორჩეული და მაღალი ხარისხის ყურძენი მწიფდება. ჩვენი ღვინო არის დესპანი, რომელიც ღვინის მოყვარულებს მოუთხრობს  იმ ადგილის შესახებ, რომელიც ნამდვილად განსხვავებული და გამორჩეულია.

ჯანაანი ნიშნავს (და ასოცირდება) - ჯანმრთელს, ძლიერს, ღონიერს. ამიტომ უწოდეს ამ ადგილს ჯანაანი. ამ ადგილის შესახებ ინფორმაცია არსებობს ძველ ბეჭდურ გამოცემებში, მათ შორის ვახუშტი ბატონიშვილის (XVIII ს.) მიერ დაწერილი "საქართველოს გეოგრაფია". გამოცემებში "შიდა მრეწველობის მასალები", მეოცე საუკუნე, ოცდაათიანი წლები.

ჩვენ ვიყენებთ მდგრადი და ორგანული მევენახეობის პრაქტიკულ მეთოდებს, რათა დავიცვათ ვაზის ბუნებრივი ბალანსი. ვენახში ვიყენებთ ტრადიციულ პრაქტიკას,  თითოეულ ვაზთან ინდივიდუალურად ვმუშაობთ მისი სპეციფიკური მახასიათებლების შესაბამისად. ჩვენ არ ვიყენებთ ჰერბიციდებს და ქიმიურ სასუქებს. ბალახს ვთიბავთ და ვენახში ვტოვებთ. ვიყენებთ ბუნებრივ კომპოსტებს და ნაკელს (3-4 წელიწადში ერთხელ).

ჩვენი არჩევანი  მინიმალური ინტერვენციაა. მარანში ვინიფიცირდება  ქარვისფერი და წითელი ნატურალური, ავთენტური ქვევრის ღვინოები. ქვევრში ღვინის დაყენების  ტრადიცია ემყარება ტერუარს და ვიყენებთ უძველეს, არტიზანულ და კახურ ტრადიციულ მეთოდებს. ბუნებრივი, სპონტანური ალკოჰოლური და მალოლაქტიკური დუღილი ემყარება "მიკრობულ ტერუარს", რის შედეგადაც ჩვენი ღვინოები გამოირჩევიან კომპლექსურობით, სურნელითა და გემოებით. ტერუარს ახასიათებს მრავალკომპლექსური ეკოსისტემა, სადაც ვაზი (გენეტიკური მასალა და კულტურული პრაქტიკა) ურთიერთქმედებს გარემოს ფაქტორებთან: ნიადაგი, კლიმატი, მიკროკლიმატი, ადამიანი, რაც გავლენას ახდენს კონკრეტულ ადგილზე წარმოებული ღვინის ხარისხსა და ტიპიურობაზე. მარანში ვიყენებთ (პრაქტიკულ) ბიოდინამიკური მეღვინეობის სტანდარტებს. ჩვენ ასევე ვიყენებთ მთვარის კალენდარს.

ჩვენ ვაწარმოებთ ღვინოებს ენდემური ჯიშებისგან: საფერავი, მწვანე კახური, ქისი, ხიხვი და რქაწითელი. ჩვენ ასევე ვამზადებთ ქარვისფერი ღვინის ბლენდებს, როგორიცაა: რქაწითელი-მწვანე კახური, ქისი-მწვანე კახური, ქისი-რქაწითელი, ხიხვი-მწვანე კახური.

ქვევრის ქარვის ნატურალური ღვინოები დაყენებულია კახური ტრადიციული მეთოდით - კანთან კონტაქტითა და დუღილის შემდგომი ხანგძლივი მაცერაციით.  ქვევრის წითელ ნატურალურ ღვინოებში გამოიყენება Vatting  პერიოდი 20 დღიდან 3 თვემდე, რაც დამოკიდებულია კონკრეტულ რთველზე.

მარანში არ ვიყენებთ ფილტრაციას, პრესირებას. ღვინოები ძველდება რთვლის შემდგომი წლის ოქტომბერ-ნოემბრამდე. ასევე ზოგიერთ ღვინოში ვიყენებთ ლექზე დავარგებას.

JAnaaniWineCellar

FAMILY WINE CELLAR & VINEYARDS

Georgia, Kakheti, Ruispiri

e-mail: jannaaniwinecellar.kakheti@gmail.com

TEL: +995 579  375577